Search
  • Gunna Stella

Nú er það svart!


Það er eintóm gleði að kynna til leiks nýjan pistlahöfund á síðunni Einfaldara líf. Unnar er brosmildur og jákvæður. Hann hefur tileinkað sér gott heilbrigt hugarfar þegar kemur að viðhorfum til fjármála og gjafmildis og almenna jákvæðni í lífinu.


Unnar er giftur Öldu Björg Lárusdóttur og eiga þau þrjú börn.


Þú getur fylgt Unnari á Instagram.


Nú er það svart!


Ég steig á vigtina í morgun og það má segja að mér mér hafi sortnað fyrir augum. Í dag er svartur föstudagur og hann ber nafn með réttu.Það er samt ekki svo að þetta hafi komið fullkomlega aftan að mér. Ég hef vitað í hvað stefndi í nokkurn tíma, rétt eins og að föstudagur kemur í hverri viku og svartur föstudagur árlega. Ég hef líka verið mjög meðvitaður um hvað veldur þessari óþarfa þyngdaraukningu undanfarin ár en það hefur varla gert meira en að hægja aðeins á þróuninni. Ég hef einfaldlega neytt meira en ég þarf. Sökin er mín og kvölin í hvert sinn sem ég stíg á vigtina eða horfi á mig í speglinum. Verst hvað er erfitt að spóla til baka! Og þrátt fyrir ótal tilraunir til að breyta þessari óheillaþróun á ég enn nokkuð í land.


Fyrir marga er dagurinn í dag upphafsdagur stærstu neysluhátíðar ársins þar sem allt flæðir í frábærum tilboðum á öllum hlutum sem hugurinn girnist. Allir gera góðan díl í stórum stíl. jólin eru í nánd.


Mér er litið niður á framstæða bumbuna og hugsa sem snöggvast, þarf ég virkilega á þessu að halda? Er nóg pláss í geymslunni?



Nú flæða yfir mig tilboð sem ég veit að verða komin aftur á tilboð rétt fyrir jólin og svo enn aftur í janúar þegar útsölurnar hefjast af krafti. Líklega spara ég bara mest á því að kaupa ekki meira. Hægja aðeins á neyslunni. Leggja jafnvel eitthvað til hliðar og gefa öðrum. Leyfa öðrum að njóta þess sem ég á og get gefið, það er víst af nægu að taka þegar ég lít í kringum mig. Sem minnir mig á það, ég þarf víst að fara að taka til í geymslunni… aftur.


Eina raunhæfa leiðin til að fá afslátt á

vigtinni er minni neysla.


Einfaldara líf fæst með því að kaupa færri hluti og nota þá lengur og betur. Njóta betur.


Með von um að þú eigir góðan dag,

Unnar Erlingsson


© 2017 Gunnhildur Stella Pálmarsdóttir