Search
  • Gunna Stella

Að kveðja þvottafjallið

Þvottafjall! Kannist þið við það?


Ég hef oft pirrað mig á þvottinum sem fylgir stóru heimili. Reyndar var ég pirruð yfir þvottinum áður en við eignuðumst svona mörg börn. Mér fannst þvotturinn vera endalaus (sama hvað við vorum mörg). Fyrir nokkru síðan lærði ég nýja aðferð sem hefur gert það að verkum að mér finnst ég ekki vera að drukkna í þvotti. Ég ákvað að nota þessa aðferð í nokkurn tíma áður en ég myndi skrifa um hana hér til þess að athuga hvort hún myndi í raun virka og viti menn! HÚN VIRKAR!



Við búum í tveggja hæða húsi og eru herbergin á efri hæðinni og þvottahúsið á neðri hæðinni. Ég er með þvottakörfu á efri hæðinni fyrir óhreinan þvott og nú hafa allir lært að setja sinn óhreina þvott þangað. Þessa körfu fer ég með niður að morgni dags og skelli í þvottinum í þvottavélina. Yfirleitt er þvotturinn þannig að þá má blanda honum saman nema það sé eitthvað alveg sérstakt. Ég þvæ hinsvegar föt sér og handklæði og tuskur sér. Fötin set ég í þvottavélina á prógramm sem tekur 45 mínútur þannig að á meðan börnin borða morgunmat sér vinnukonan (þvottavélin) um að þvo þvottinn og þegar hún er búin hengi ég þvottinn upp. Þvotturinn þornar svo yfir daginn og tek ég hann niður að kvöldi og brýt hann saman á efri hæðinni og set í bunka á lága hillu sem er í sjónvarpsherberginu. Að morgni dags sækja svo allir sinn bunka og setja í sína skúffu eða sinn skáp. Þetta hefur gengið svo vel að sá yngsti (2. ára og 9 mánaða) er alveg með það á hreinu hvernig sinn bunki lítur út og sækir hann með gleði og setur í sína skúffu (sem er í réttri hæð fyrir hann).


Tuskur og handklæði og set ég í þvottavélina (ef þarf) þegar ég er búin að taka fötin úr henni og set það svo í þurrkarann þegar það er búið (ef ég er heima) annars má það alveg bíða þangað til ég kem heim.


Þegar við höfum farið í ferðalög eða ég hef þurft að fara í burtu í einhvern tíma þá auðvitað fer rútínan úr lagi en ég er fljót að vinna hana upp aftur. Þetta hefur gert það að verkum að þvottakarfan er oftast tóm í þvottahúsinu og mömmunni líður betur og þá líður öllum á heimilinu betur.


Í stuttu máli


1. Allir setja óhrein föt í körfu

2. Óhreinn þvottur settur í þvottavélina þegar ég vakna

3. Stillt á 45 mínútna prógramm

4. Hengt upp úr vélinni áður en farið er að heiman að morgni dags

5. Brotið saman og sett í bunka fyrir hvern fjölskyldumeðalim að kvöldi

6. Allir ganga frá sínum bunka að morgni næsta dags



Kærleikskveðja,


Gunna Stella





© 2017 Gunnhildur Stella Pálmarsdóttir